ACARA PASKAH I Bahasa Batak

 

& Ev: Johannes 20 : 1 – 18                & Ep: Psalmen 118 : 1-2, 14-24

TOPIK: “MANGOLU DI BAGASAN ASI NI ROHA”

HKBP KEBAYORAN BARU

MINGGU, 16 April 2017

 (U=Uluan; R:Ruas; N: Naposo; A: Ama; I: Ina)

1.   JOUJOU PARSOMBAON TU DEBATA

U:  Hamuna dongan sahuria, na marpungu do hita ari Minggu sadari on marningot dohot manghalashon denggan basa ni Jahowa naung pinasahathonNa tu hita saluhutna, ai dilehon do AnakNa na sasada i gabe pelean pardengganan pasaehon dosanta.

R:  Hupuji hami ma Ho Tuhan marhite pesta Paskah sadari on, ala nunga monang Ho maralohon huaso ni hamatean i. HamonanganMi ale Jesus gabe hamonangan nang di hami.

U:  Tapaserepma dirinta diadopan ni Debata, ai na Badia do Ibana jala pargogo naso hatudosan, siboto nasa na adong di bagasan rohanta, alani tapuji ma Ibana dibagasan habadiaon.

        R:  Hupaserep hami  ma dirinami marsomba di jolo ni habadiaonMi, sai jangkon ma hami asa marolopolop daging nang tondinami.

U:  Antong rap ma hita mamuji pasangaphon Tuhan i, marende ma hita :

           

2.   Marende BE No. 91:1 - 3 ” Hatuaon Do”                            

        ^♫♪♫ Hatuaon do las ni roha do hangongot ni Tuhanta i

           :;:Mago do hita, ngot ma Tuhanta las be, las be ma rohanta i:;:

      ^♫♪♫ Hatuaon do las ni roha do hangongot ni Tuhanta i

            :;:Monang  do Jesus, talu sibolis , las be, las be ma rohanta i:;:

                                  ---Musik---                                                               (Jongjong)                                           

        ^♫♪♫ Hatuaon do las ni roha do hangongot ni Tuhanta i

           :;:Mungkap do dalan, tu hangoluan, las be, las be ma rohanta i:;:

          

3.   VOTUM – INTROITUS - TANGIANG

U:  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on.

R:  Amen

U:  Unang ho mabiar, Ahu do bonana dohot ujungna.

       R:  Na mangolu do, jala naung mate do Ahu najolo, jala ida ma:

U:  Ahu do na mangolu ro di saleleng ni lelengna, jala di Ahu do anakhinsu ni banua toru dohot hamatean. Haleluya!

R:  (Mangendehon): Haleluya, Haleluya, Haleluya.

U: Martangiang ma hita: Ale Tuhan Jesus, Tuhannami! Na mandok mauliate do hami tu Ho, ala ditaluhon Ho do dosa dohot hamatean marhitehite hamamateMi, ala disondangi Ho tanomannami, asa marpangkirimon na mangolu hami ala ni haheheonMi. Ndang pola mabiar hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho dibagasan haporseaon na mangolu, paima sahat hami tu lambungMu. Amen                                                                                        (~~hundul~~)

4.   Marende BE No. 93:1 - 2  ”Pesta Paska Hatuaon”             BL.91

                  ^♫♪♫     Pesta Paska hatuaon, Pesta Paska haluaon,

              Sian hamatean i, sian hamatean i

              Tuhan Jesus do pasuang, hangoluan, hasonangan, tu saluhut jolma i.

       ^♫♪♫ Talu ho banuatoru ndang tarbahen tiopanmu

              Raja Sipangolu i,  Raja Siparngolu i

              Hamatean, hamagoan na so pola habiaran, nunga talu i sude.

5.   P A T I K

U:  Patik ni Debata sihangoluhononta di bagasan pestanta sadari on, tarsurat di 1 Korint 15 : 13, songonon ma didok disi: Alai anggo so adong haheheon ni angka na mate, ndang na hehe nang Kristus.

I do sahat na, martangiang ma hita laho mangido gogo sian Debata mangulahon patikNa i.

R:  Ale Tuhan Debata, sai pargogoi ma hami mangulahon na hombar tu patikMi. Amen.

6.   Marende BE No. 89: 1 - 2   “Ate di dia Soropmi”        BL 130

        ^♫♪♫ Ate di dia soropmi nuaeng, o hamatean ?

           Di dia hamonanganmi nuaeng banuatoru ?

           Na talu do hamu sude, na talu do sibolis pe, ai ditaluhon Jesus

                                      (Jongjong)

        ^♫♪♫Nang pe manggogo ulok i mangalo ulubalang

            Laos talu do tongamna i dibaen na somal monang.

            Tambihul nii diturbing  pe, laos so tarbaensa monang be, tarlisat do uluna.

7. JOUJOU DOHOT TANGIANG TU PANOPOTION NI DOSA

     (U:Uluan; A:Ama; I:Ibu; N:Naposo; R:Ruas)

U:  Hamu angka dongan, mardosa do hita tu Debata di ganup ulaonta. Mardosa di pangalaho, mardosa hita di hata, mardosa dohot di pingkiran. Saluhut hadirionta tung mardosa do. Dibaheni tapaserep ma rohanta, martangiang ma hita mangido hesesaan ni dosanta:

A:  Ale Debata Jahowa, di na hubolus hami ariari ni ngolunami di portibion, huadopi hami angka hamaolon dohot parungkilon. Jotjot do hami ndang marhaposan tu Ho, holan gogo dohot pingkirannami do na hupangasahon hami. Gabe jotjot ma hami madabu tu pandelean, ngolu na bobonosan, ngolu na tahutan ala so Ho hubahen hami haporusan dohot partanobatoan ni ngolunami.

I:    Ale Tuhan Jahowa, diigil Ho do sian hami asa gabe ina na pantas marroha. Hape di parngoluonnami siganup ari ndang marsitutu hami manghangoluhon i. Jotjot do hami lemba mangajarhon hataM di tongatonga ni keluarganami.

N:  Ale Tuhan,  lehon ma tu hami tondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibion, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami.

U:  Ale Tuhan Debata, Amanami na di banuaginjang, ramun do hami di jolom, alai Ho do  patupahon hasesaan ni dosa di hami halak na dangol on, marhitehite Anak haholongan ni rohaM, sai palua ma hami sian gambo lisop ni dosa i, asa unang lonong hami. Songoni nang sian angka na manghosom hami. Sai asi ma rohaM di hami angka na mangarsakhon dosanami, sai unang tabunihon bohiM maradophon hami, ai hagogotan situtu do hami, hapogani ma mangalusi hami, jala sai patinggil ma pinggolMu ganup ari tumangihon anggukangguknami, asa tung malua situtu hami sian haramunon nami.

R   :            Mangendehon BE No. 686:1   ”Ramun do au”

               ^♫♪♫ Ramun do au dijoloMi, gok dosangki urasi au

         O, Jesus, Birubiru i, di son do au patau ma au.

U: Tabege ma bagabaga ni Debata taringot tu hasesaan ni dosa. Molo tung adong manang ise na mardosa, adong do pangondianta di Ama i, I ma Tuhan Jesus Kristus na tigor roha i. jala Ibana do pardengganan taringot tu dosanta, alai ndada holan taringot tu dosanta, dohot do taringot tu dosa ni saluhut portibi on. Hasangapon ma di Debata na di ginjang.

U+R: Amen                                                                                                  ~~~Hundul~~~

8. Marende BE No. 94 : 1 - 2   “Ale Tondingku”                    BL. 44

      ^♫♪♫Ale tondingku, naung hehe Tuhanmu,

          Nunga ditaban do banuatoru, las ma roham, ai martua ma ho,

          :,:Rap dohot Jesus mangolu ma ho:,:

          ^♫♪♫ Talu Sibolis dibahen Tuhanta, nang hamatean

                Nang dosa sudena, sai di halashon rohanta ma i,

                :,:PangoluonNa do hita sude:,:

9. Epistel:

      (U:Uluan; A:Ama; I:Ibu; N:Naposo)

U:  Tabege ma Hata ni Debata turpuk Epistel di ari Minggu Paska I sadari on, i ma na tarsurat di Psalm 118:1-2+14-24, tajaha ma marsingkat sorin: Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohaNa.

A   : Dohonon ni Israel ma tongon: ”Ai ro di salelenglelengna do asi ni rohaNa”.

U   : Jahowa do pargogongku dohot endengku, jadi gabe hatuaonhu Ibana.

I:    Soara ni olopolop dohot hatuaon marsaringar di undungundung ni angka partigor: ”Siamun ni Jahowa do sibahen hamonangan.

U:  Timbul situtu do siamun ni Jahowa, siamun ni Jahowa do sibahen hamonangan.”

N:  Ndang tagamon mate ahu, sai na mangolu do ahu, asa hupajojor angka pambahen ni Jahowa.

U:  Nunga gogo tutu dipinsang Jahowa ahu, alai nda tung tu hamatean ahu dipasahat.

A:  Ungkap hamu ma di ahu angka bahal ni hatigoran, asa hubongoti angka i laho mamuji Jahowa.

U   : On do bahal ni Jahowa, bongotan ni angka partigor do i sogot.

I:    Mandok mauliate ma ahu di Ho, ala naung dialusi Ho ahu, jala manjadi hatuaonhu.

U   :                                                                                                 Batu naung binolonghon ni angka pande bagas, i ma jadi batu parsuhi.

N   : Sian Jahowa do i masa, halongangan do i anggo di matanta.

U:  Ari on do na jinadihon ni Jahowa, marolopolop jala marlas ni roha ma hita disi. I do sahat na.         Martua do na tumangihon Hata ni Debata jala na umpeopsa.

U+R: Amen.

10. Koor : - Kezia

                  - Ina Hanna

11. Marende BE No. 92: 1+3   “Puji Ma Na Manaluhon”     BL.178

      ^♫♪♫Puji ma na  manaluhon dosa hamatean i

            Puji ma na pangoluhon saluhut pardosa i

            Jesus na dung mate i, las roham o huriaNa 

           Ala na mamillit ho, Jesus i mangolu do                          (Jongjong)

        ^♫♪♫ I do las ni rohanami lao mamujimuji Ho

            Ndang be sitoruan hami ala na dung mate Ho

            Dungkon ni mangolu Ho nunga ringan tondinami

     Sian hangoluanmi ala hamonanganMi

12. Manghatindanghon Haporseaon                                              

U:  Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

R: Ahu porsea ...                                                       

 ~~~ hundul ~~~

13. Koor: - Serafim

                 - Seksi Parompuan

14. Tingting

15. Marende BE No.96:1... “Pujima ma na manaluhon”  BL 178

(Papungu Pelean la + lb)

          ^♫♪♫ Nunga talu hamatean dibaen Tuhan Jesus i

            Ai na hehe do Ibana songon na nidokNa i

            Haleluya, haleluya nunga hehe Jesus i

            Haleluya, haleluya nunga hehe Jesus i

       ^♫♪♫ Ia angka boruboru lao do tu tanoman i

             Ndang disi be Tuhan Jesus nunga hehe sian i

             Haleluya, haleluya nunga hehe Jesus i

             Haleluya, haleluya nunga hehe Jesus i

                        --- Organ ---

     ^♫♪♫ Marlasroha be ma hita ala hehe Jesus i

            Ai malua sude hita sian hamagoan i.

            Haleluya, haleluya nunga hehe Jesus i

            Haleluya, haleluya nunga hehe Jesus i

                  ^♫♪♫ Sai tapuji ma Tuhanta na marholongroha i

                  Tapasangap ma Ibana na marasiroha i

                  Haleluya, haleluya nunga hehe Jesus i

                  Haleluya, haleluya nunga hehe Jesus i.

                         --- Organ ---

16. Jamita : Johannes 20 : 1 - 18

17. Marende BE No. 633:1 ...  “Nunga Hehe Kristus i”    BL.633

(Pelean tu Kategorial Parompuan HKBP)

       ^♫♪♫ Nunga hehe Kristus i haleluya, sian hamatean i, haleluya

      Parlangitan jouhon ma, haleluya, tano on alusi ma, haleluya.

      ^♫♪♫ Singkop panghophopNa i, haleluya, gok hamonanganNa i, haleluya,

Sondang haluaon i, Haleluya, patiur dalanta i, Haleluya.

--- Organ ---

        ^♫♪♫ Tartaban naroko i, Haleluya, di baen Tuhan Jesus i, Haleluya

             Nunga mungkap surgo i, Haleluya, di na tinobusNa i, Haleluya.

        ^♫♪♫ Monang do Tuhanta i, Haleluya, talu hamatean i, Haleluya

Mago do sorop na i, Haleluya, ala monang Tuhan i, Haleluya.

                                                  --- Organ ---

        ^♫♪♫ Sangap ma di Tuhan i, Haleluya, puji ma goarNa i, Haleluya.

             Baen hamonanganNa i, Haleluya, manondangi ngolumi, Haleluya.

        ^♫♪♫ Raja hangoluan i, Haleluya, na sun hinagogo i, Haleluya

            Jalo ma pujianki, Haleluya, nang holong ni rohangki, Haleluya.

  ~~ Jongjong ~~

18. Parsuruon:

U  : Nunga Hehe Tuhan i, nunga tutu hehe Ibana. Ari on do na jinadihon ni Jahowa, marolopolop jala marlas ni roha ma hita disi. Batu naung binolongkon ni angka pande bagas, i ma gabe batu parsuhi. Pinamasa ni Jahowa do i, halongangan do i anggo di matanta. 

R  : Haleluya! Di Tuhan Debatanta i do hatuaon dohot hagogoon ro di hangoluan selelenglelengna.   

U  : Las ma rohanta ala nunga hehe Ibana; lam girgir  ma hita mamuji goarNa, di angka ulaonta be songon i nang di bagasta pe. Ai nunga monang Tuhanta i, nunga tartaban banuatoru, ndang adong be sihabiaranta. Ala hamonanganNa i nunga partohap hita di hangoluan selelenglelengna. Antong ingkon dohot ma hita mamaritahon goarNa i di bagasta be, laos songon i nang tu na humaliang pe. Borhat ma hamu, baritahon hamu ma pambahenanNa halongangan i.

 U+R : Mangendehon BE No. 627: 4  “Jesus Naung Hehe”

             ^♫♪♫ Tabaritahon Tuhanta i, na hehe jala mangolu i.

                Singkop do panghophopanNa i, di hita jolma pardosa i.

                Las ma roham puji ma Tuhan i, ala naung talu hamatean i.

                Sesa dosanta, haleluya mangolu Jesus, haleluya.

19. Tangiang Panutup : Tangiang Pelean + Tangiang Haheheon + Tangiang ”Ale Amanami” + Tangiang  Pasupasu.