ACARA BUHABUHA IJUK

HURIA KRISTEN BATAK PROTESTAN

(HKBP) RESSORT KEBAYORAN

PARTONDING NI ACARA BUHABUHA IJUK

PARNINGOTAN HAHEHEON NI TUHAN JESUS

-------------------------------------------------------------------

“SELAMAT PASKAH”

MINGGU, 16 APRIL 2017

PKL. 05.00 WIB

PARTONDING NI ACARA BUHABUHA IJUK

PARNINGOTAN HAHEHEON NI TUHAN JESUS

MINGGU, 16 APRIL 2017

-------------------------------------------------------

(Dung Martangiang Angka Parhobas di Konsistori,

pittor tu jolo ni langgatan ma Paragenda lao manguluhon Acara)

01. Patujolo :

      (U = Uluan; H = Huria)

      U   :  Nunga ro hita nuaeng marningor haheheon ni Tuhan Jesus sian na mate. Barita Nauli I patolhashon tu hita barita haheheon ni Jesus i.

               Alai di buhabuha ijuk, di ari parjolo dung salpu Sabbat i, ro ma si Maria Magdalena dohot si Maria na sada maningkir tanoman i.  Alai nunga masa lalo na gogo. Ai tuat do surusuruan ni Tuhan sian banua ginjang; jala dung sahat, digulang ma batu i, laos hundul diatasna. Alai songon hilap do rupana idaon, saksak do ulosna songon hapur.

      H   :  Jadi angka dotdot ma parjaga i dibahen biar ni rohanasida, hira na mate do.

      U   :  Alai ninna surusuruan i ma mandok parompuan i: Unang hamu mabiar, ai huboto, dilului hamu do Jesus, naung diparsilangkon. Ndang dison Ibana.

      H   :  Ai nunga hehe Ibana, songon na nidokna hian.

      U   :  Pajonok hamu ma; ida hamu ma inganan hapeahanna i! Hatop ma hamu laho tu angka siseanna i paboahon, naung hehe Ibana sian na mate, jadi joloananna do hamu tu Galilea, disi ma idaonmuna Ibana; nunga hupaboa i tu hamu. Dung i hatop ma nasida laho sian tanoman i, mabiar huhut las situtu rohanasida; marlojong do nasida laho mamaritahonsa tu angka siseanna. Jala ido hatindanghononta nuaeng molo taendehon Endeta on. Marende ma hita paboahon haheheon ni Jesus i.

      H   :  Marende BE.No : 96 : 1 + 3 “Nunga Talu Hamatean“      BL. 101

               Nungga talu hamatean dibaen Tuhan Jesus i,

               Ai na hehe do Ibana songon na nidokNa i.

               Haleluya,heleluya nungga hehe  Jesus i,

               Haleluya, haleluya nungga hehe Jesus i.

            (Jongjong)

               Marlas roha be ma hita  ala hehe Jesus i,     

               Ai malua sude hita sian hamagoan i

               Haleluya- haleluya nungga hehe Jesus i

               Haleluya-haleluya nungga hehe Jesus i.

02. VOTUM-INTROITUS-TANGIANG

      (U=Uluan ;  H= Huria)

      U   :  Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi parbadia na tumompa langit dohot tano on.

      H   :  Amen

      U   :  Ahu do sipangolu, naung mate do Ahu na jolo, gabe mangolu antong ro di saleleng ni lelengna, di Ahu do anak hinsu hamatean dohot banua toru.

      H   :  Ida ma, Debata do hatuaonku, Ibana huhaposi jala ndang mabiar ahu, ai Jahowa do hagogoonku jala pujiongku, manjadi hatuaon di ahu.

      U   :  Martangiang ma hita : Ale Tuhan Debata  na mandok mauliate do hami tu Ho, ala ditaluhon Ho dosa dohot hamateannami marhitehite haheheonMi. Ndang pola be mabiar hami mida hamatean, Ho do ulunami, ruasMu do hami, dipaunsat Ho do hami sian hamatean tu hangoluan. Pargogoi ma hami mangoloi, pasangaphon Ho ariari, marhite haporseaon na mangolu, paima sahat hami tu lambungMu. Amen                 (Hundul)

03.       Marende BE. No : 92 : 1 – 2 “Puji ma Namanaluhon“         BL. 178

      Puji ma na manaluhon dosa hamatean i

      Puji ma na pangoluhon saluhut pardosa i

      Jesus na dung mate i las roham o huriaNa

      Ala na mamillit ho Jesus i mangolu do

            Tole hita mangendehon halalas ni roha i

            Dohot marolopolophon sangap ni na monang i

            Na tongtong mangolu i tole hita mangendehon

            Halalas ni roha i, di parngolu Jesus i.

04.       Epistel di hita ditingki on, ima na tarsurat di Jona 2 : 1 – 10.

      (U=Uluan, H = Huria)

     

      U   :  Dung i diparo Jahowa ma sada ihan raya, asa di bondut si Jona. Jadi * di bagasan butuha ni ihan i ma si Jona tolu ari tolu borngin. Dung i martangiang ma si Jona tu Jahowa Debatana, sian butuha ni ihan i.

      H   :  Jala didok ma: * Joujou do ahu sian hagogotanki tu Jahowa gabe dialusi ibana ahu. Sian butuha ni parbeguan ahu mangangguhi: Ditangihon ho do soarangki!

      U   :  Nunga direonghon Ho ahu tu bagasan lung tu bagasan pusupusu ni laut, gabe pusat manghaliangi ahu, sude * angka ombakMi dohot galumbangMi mangalungkupi. Ianggo ahu, * nunga hudok: Nunga bali ahu sian jolo ni mataM; alai tahe ulahanHu dope mamereng dompak joro habadiaonMi.

      H   :  Nunga nian dihaliangi angka aek i ahu, pola tos hosangku, lung i pasampaksampak ahu sirambon do alit tu ulungku.

      U   :  Nunga mangungkor ahu sahat tu bona ni angka dolok, ransangransang ni tano on pe nunga tarsordak humaliang ahu ro di salelenglelengna. * Alai dipanangkok Ho ngolungku sian godung ale Jahowa Debatangku.

      H   :  Uju mandate hosangku di bagasan, Jahowa ma huingot, jadi sahat ma tangiangku tu Ho, tu joro ni habadiaonMi.

      U   :  Alai halak na * marsomba tu ganaganaan sipaotooto, i ma na manadingkon hasonangannasida i. Alai anggo ahu mardongan soara pujipujian ahu mamele tu Ho, gararonHu do na huparbagabaga, Jahowa do nampuna hatuaon. Ido sahatna: Martua do angka natumangihon hata ni Debata, jala na umpeopsa. Amen.

05. Marende. BE. 93 : 3   “Pesta Paskah “                            BL. 91

      Tuhan Jesus do na monang, Tuhan Jesus do pasuang,

      Las ni roha dame pe, las ni roha dame pe,

      Dongan golom ma hataNa, Na porsea di  Ibana; Ndang tagamon mago be.

06. JAMITA : 1 Korint 15 : 1 – 4

07.       Marende.BE.No : 90 : 1 – 2  “ Sai tapuji Debatanta “                      BL. 175

      Sai tapuji Debatanta ale hajolmaon i,

      Ai naung hehe do  Tuhanta sian hamatean i,

      Dipasidung Jesus i ulaonNa  sasude,

      Patupahon haluaon disaluhut hajolmaon.

            Anggo utang ni dosangku digarari Jesus i.        (Jongjong)

            I do haporseaongku di na tinaonNa i

            Nunga tulus patik i, nunga mintop rimas i

            Di na hehe i Ibana ro di au hangoluanNa

08. TANGIANG ( U=Uluan, H=Huria, A=Ama, I=Ina.  )

      U   :  Ale Tuhan Jesus Anak ni Debata na mangolu, mauliate ma rohanami tu Ho ala naung dipabinsar ho hangoluan marhitehite haheheonMu.

      H   :  Mauliate ma di Ho o Tuhan, Na marlas ni roha do hami nuaeng marningot haheheon ni Tuhan Jesus sian na mate, laho paluahon hami.

      U   :  Nunga talu si bolis, talu hamatean, talu banua toru

      A   :  Ndang mabiar be hami mida hamatean dohot soropna, ai nunga monang Tuhannami pangulunami na gogo i.

      I     :  Ibana do manogihon hami sian hamatean tu haheheon sogot.

      U   :  Ale Tuhan, Patogu ma haporseaonnami maniop barita nauli, asa unang ganggu rohanami mamolus hangoluan on nang jumpa          hamatean i.

      H   :  Sai sungguli ma rohanami dohot roha ni donganami, asa rap hehe hami sian parrohaon na buruk i, jala tarulahon hami parange na imbaru di joloM.

      A   :  Pasupasu ma huriaM dohot parbarita na uli mamaritahon haheheon ni Tuhan Jesus Kristus Tuhannami.

      I     :  Asa sai malungun hami tu banua ginjang marhitehite haheheon ni Tuhan Jesus Kristus Tuhannami.

      H   :  Mangendehon BE. No: 91 : 2   “Hatuaon do“       BL.  55

               Hatuaon do las ni roha do hangongot ni Tuhanta i,

               Monang do Jesus, talu sibolis, las be, las be ma rohanta i. (2x)

              

09.       TANGIANG  PANUTUP… Ale Amanami… Pasu-Pasu… Amen.

“SELAMAT PASKAH”