ACARA JUMAT AGUNG Bahasa Batak

ACARA PARMINGGUON

PARNINGOTAN ARI HAMAMATE NI TUHAN JESUS

HKBP RESORT KEBAYORAN

Jumat, 14 April 2017

=======================================================

“ JESUS DO NA PALUA HITA “

(Markus 15:22-41)

1.   Joujou tu parsaoran:

*) U=Uluan/Paragenda

U: Hamuna angka dongan, parsaoranta sadarion i ma Pesta Parningotan di ari Hamamate ni Tuhanta Jesus Kristus. Alani i, taparade ma roha nang pingkiranta, asa masuk hita tu parsaoran na badia on. Tapaunduk ma dirinta tu toru ni Silang ni Tuhanta i, asa lam tahangoluhon holong ni rohaNa tu hita angka jolma pardosa.

....... Martangiang na hohom dibagasan roha, pasahat diri tu Tuhanta, huhut organ angonangon mangendehon saayat sian  BE No 622 ……

U: Nunga tapaunduk jala tapasahat tutu rohanta dohot dirinta tu toru Silang ni Tuhanta I, tangkas ma tutu tahilala holong ni rohaNa tu hita, jala tangkas ma tutu nang siondang ni SilangNa I, pahisar tondinta naung magopu jala manubuhon panghirimonta. Antong taendehon ma i, gabe panindangionta. Lambok ma taendehon:…………..

H: (Mangendehon BE No. 622 : 1-2  “ Mansai Nalnal Di Angka Partingkian ”     

Mansai nalnal di angka partingkian, sinondang ni silangMu Tuhanki/

Sian hatiuron na marsinondang, holongNa na so halompoan i/

 Sudena bangso do marpanghirimon, tu sondang ni asi ni roha i/

 Songon parluga na manghalungunhon, parbinsar ni mata ni ari i.

SilangMu Kristus tanda ni holongMu, pahisar tondi na magopu i/ Mangalononghon sasude dosangku, mabaor tu laut asi ni rohaMi/

Naung tubu hami gabe na imbaru, na niurasan sian dosa i/

Ala mudarmu na niusehonmu, di Golgata di hamamateMi.

U: Ima tutu panindangionta, hisar ma tutu  tondinta, nunga tubu be hita gabe na imbaru, gabe marpanghirimon sahat ro di ujung ni ngolunta. Amen.

2.      Marende BE No 83:1-3 “ Na Lao Do Birubiru I “

Na lao do birubiru i, mamorsan angka dosa/ Di nasa hajolmaon i, dibenget ni rohana./ Diporsan do sahitta i, dilehon do diriNa i/ Tu tangan ni pamunu./

Ditaoi do na bernit i, ro di na tos hosaNa i/ Didok naeng porsanonku

Ianggo birubiru i, i ma alealengku na paluahon tondingki/ Disuru Debatangku, Didok mandok AnakNa i/ Sai topot ma pardosa i naung sun tinoruanku/ Balga tutu do rimashi, alai tarbaen do mombun i/ Horhonon ni mudarMu

------  jongjong-----

Na olo au ale Amang, sian sandok rohangku/ Pasauthon lomo ni rohaM, roham sambing do guru/ O holong ni rohana i, tung aha do tudosanMi/ Na songon Ho margogo, dilehon Debata hape/ Anakna, lao manaon sude sitaonon ni na mago

3.   Votum - Introitus – Tangiang

*)U=Uluan/Paragenda;  H=Huria/Ruas

U: Marhitehite goar ni Debata Ama, dohot goar ni AnakNa Tuhan Jesus Kristus, dohot goar ni Tondi Parbadia, na tumompa langit dohot tano on.

H: Amen

U: Dileai jala dipasiding  jolma do Ibana, Baoa na somal mangae pardangolan dohot sahit Ibana, pola di tabunihon halak bohina maradophon Ibana.

H: Dibahen leana, jadi ndang pola hurajumi hami Ibana.

U: Hape ala ni pangalaosionta Ibana tartullang!

H: Binahen ni hajahatonta Ibana mabugang

U: Ampe tu Ibana pinsang-pinsang parhitean ni hasonanganta!

H:  Jala binahen ni bugangNa malum itahilala

U+H: (Mangendehon: Haleluya, Haleluya, Haleluya)

U: Martangiang ma hita: Ale Amanami jala Debata nami! Parasi roha na sumurung do Ho di sude jolma manisia. Nunga dilehon Ho AnakMu Tuhan Jesus Kristus Tuhan nami, manaon haleaon dohot insakinsak, pola tung mate tarsilang, asa malua hami sian gomgoman ni sibolis. Sai parrohai ma hami mamingkiri panaonon ni AnakMu Tuhan Jesus Kristus, asa maruli hami marhite sian i di hasesaan ni dosa dohot haluaon sian hamatean paduahalihon. Asa dapot hami hangoluan saleleng ni lelengna, marhitehite Tuhan Jesus Kristus Tuhan nami, anak haholongan ni rohaM. Amen.    

------Hundul

4.   Marende: BE No. 718: 1-2  “ Hubege Jesus Manjou ”

Hubege Jesus manjou, hubege Jesus manjou,/Sipalua au manjou, porsan silang ihuthon ma au,/Sai ihuthononku Jesus, sai ihuthononku Jesus,/Sai ihuthononku Jesus,huihuthon Jesus Tuhanki.

Tu Getsemane au dohot, tu Getsemane au dohot,/Rap marungkil dohot Jesus, mangihuthon Jesus Tuhanki,/Sai ihuthononku Jesus, sai ihuthononku Jesus,

Sai ihuthononku Jesus,huihuthon Jesus Tuhanki.

5.   Patik

*) U=Uluan/Paragenda; H=Huria/Ruas

U: Patik ni Debata, di Ari Parningotan hamamate ni Tuhanta sadarion, ima Hata Ni Debata na tarsurat di Roma 8:13, Ai molo marguru tu daging hamu marparange, mate ma hamu; alai molo dipamate hamu parulaon ni pamatang marhitehite Tondi I, mangolu ma hamu. Antong rap mangido gogo ma hita tu Debata,laho mangulahon na hombar tu patikNa i.

U+H:        Ale Tuhan Debata, sai pargogoi ma hami mangulahon na hombar tu patikMi. Amen

6.   Koor

7.   Marende: BE No. 86: 1-2   “ Silang Na badia i ”   

Silang na badia i, Ho do lombu lombungki,/Maralohon dosa i, dohot pandelean i,/Di sude sitaonon i, Ho ma lombulombungki.

------Jongjong-----

Nasa na huula i, ndang tau hasonangan i,/Nang ringkot pe rohangki, pola ro nang ilungki,/Holan asi ni rohaM, pangurupi, o Tuhan.

8.   Manopoti Dosa - Pangaradeon Tu Ulaon Nabadia

*) Pdt=Pandita; H=Huria/Ruas

Pdt:           Ale  Tuhan, dibagasan unduk dohot serep ni roha, ro do hami manopoti saluhut hasalaan nang angka dosanami, maradophon dongannami, tarlumobi maradophon Ho. Disaluhutna i, pola do ingkon mate Ho tarsilang, sai marpamuati ma rohaM tu hami. Huhilala hami do Tuhan, hansit ni na tinaoMi di Haupinarsilang i.

H: (Mangendehon: BE No. 412: 1   “ Ndi Di Dolok Adui “   

Ndi di dolok adui, silang ni Tuhan i/ Sap mudar sap tijur do i/ Jesus mate disi, asa malum dibaen, sude angka gondok roha i/ Dibaen i, tung holong rohangki, mida Silang di Golgata i/ Hupasolhot diringku tusi, dompak surgo pardalananki.

Pdt:  Ale Tuhan, bohiM na marsinondang i, na sangap jala marmulia hian,  nunga tung marlangan, jala sap tijur, hona pastap, dohot insak-insak haleaon. Molo huida hami ho, angka na hansit na tinaonMu i, tung dia ma pangkuling ni rohanami ?  Nda tijur alani pangalahonami do i ? nda tangan haramunonnami do na mamastapi i ? nda ingkon hami do nian manaon pastap-pastap i ? Nda ingkon hami hian do manaon angka tijur i?

H:   (Mangendehon: BE No.412: 2   “ Ndi Di Dolok Adui “    BL 67        

Dileai jolma i silang ni Tuhanki/ Hape haluaon do i/ Nang godang dosangki, alai sesa do i/ Dibaen mudar na durus disi/ Dibaen i, tung holong rohangki, mida Silang di Golgata i/ Hupasolhot diringku tusi, dompak surgo pardalananki.

Pdt:Ale Tuhan, tanganMu na sai mamasumasu angka situan na torop i, asa malum sian angka parsahiton, dohot simanjojakMu na sai ringgas mardalan mamboan barita na uli i,  nuaeng, nunga sap mudar be . Hutailihon hami do, nang andoraM naung bulhas hona hujur ni sordadu i, daga... hansitna i. Nda ingkon hami hian do manaon i?

H:  (Mangendehon: BE No.412: 3   “ Ndi Di Dolok adui “    BL 67        

Na mabaor sian i, mudar ni Tuhan i/ Na tau paiashon au on/ Tung na bernit ditaon, Tuhan Jesus disi, paluahon sude hita on/ Dibaen i, tung holong rohangki, mida Silang di Golgata i/ Hupasolhot diringku tusi, dompak surgo pardalananki.

Pdt: Ale Tuhan Debata Parasiroha na sumurung, asi rohaM topot ma hami na  pungu dison. Andorang hupangan hami anon parpadanon na badia i, lehon ma Tondi Parbadia tu ganup hami, asa ditubuhon haporseaon na mangolu di hami, asa pos situtu rohanami di AnakMu Tuhan Jesus Kristus, na manghophop hami. Pargogoi ma hami mansoadahon dirinami, asa tarihuthon hami Tuhan Jesus Tuhannami, jala asa ditubuhon haporseaon na mangolu i. Sai taiti rohanami asa lam malungun hami tu Banua Ginjang, asa sai masihol hami paimahon haroro ni Tuhan Jesus. Amen.

Hita angka naung pinarhamaol ni Debata, itasangkap nuaeng manganhon parpadanan na badia i. Dibahen i tatimbang ma jumolo manang na tau hita marulaon na badia, asa unang hona uhum  manang ise sian hita on. Ai holan na unduk roha jala na manolsoli rohana ala ni pambahenanna na so ture jala na manopoti dosana, jala na porsea di hasesaan ni dosa, na pinatupa ni Tuhan Jesus, ido na tau manganhon parpadanan na badia i. Alai angka na dohot marulaon na badia unang be dioloi sibolis, unang be didatdati mardosa. Tung padao hamu ma rohamuna sian i, tung gotaphon hamu ma hosom dohot late ni roha. Alai paingotingot hamu ma Tuhan Jesus Kristus naung mate i jala naung mulak mangolu humophop hamu, asa tau hamu manganhon parpadanan na badia i. Dibahen i tatangkasi ma jolo rohanta be, jala alusi hamu ma sungkun-sungkun on:

Diparhatutu roham do halak pardosa ho sian hatutubum dohot alani pangalaosim di Patik Ni Debata?

H: Olo, diparhatutu rohangku do.

Pdt:  Na marsak do roham ala ni dosami, jala dipangido roham naeng malua ho nuaeng sian dosam?

H: Olo, dipangido rohangku naeng malua ahu sian dosangku.

Pdt:  Diparhatutu roham do: Naung ro Tuhan Jesus Kristus tu tano on pangoluhon pardosa; Ibana naung mate dohot mulak mangolu humophop ho, mamorsan jala manesa dosam?

H: Olo, diparhatutu rohangku do.

Pdt:  Olo do ho manggotaphon sian roham late ni roha dohot hosom ni roha? Angkupni i olo do ho mardenggan dohot halak  na mangarsahi ho, jala na olo do ho manesa dosa ni donganmu, songon na pinangido ni roham season ni Debata sude dosam?

H:             Na olo do ahu.

Pdt:  Antong tapaunduk ma rohanta, jala tatopoti ma sude dosanta, martangiang ma hita. Ale Tuhan Debata, Amanami marhitehite Jesus Kristus Tuhannam, halak pardosa godang do hami, ai jotjot hulaosi hami patikMu. Tama do hona uhumMu hami nuaeng dohot sogot, molo baloshononMu tu hami hombar tu pambahenannami i. Alai ala ni godang ni asi dohot holong ni rohaM, dohot ala ni AnakMu Tuhan Jesus Kristus naung nilehonMu humonghop hami, alani i umbahen na hum hami mangido tu Ho: Asi ma rohaM di hami, sai jalo ma hami, sai sesa ma sude dosanami, jala lehon Tondi Parbadia tu hami, asa margogo hami mangalo nasa dosa dohot mangulahon na hombar tu lomo ni rohaM saleleng di tano on dope hami. Amen.

   Antong hamu angka na manopoti dosamuna, jala na mauas di asi ni roha ni Debata, sai sahat ma tu hamu na hinaporseaanmuna. Mangasahon hata ni Tuhan Jesus do hudok tu hamu: Pos ma rohamuna, nunga sesa saluhut dosamuna, marhitehite goar ni Debata Ama, dohot goar ni Anakna Tuhan Jesus Kristus, dohot goar ni Tondi Parbadia. Amen.

-----Hundul

9.   Marende: BE No. 84: 1&3  “ Aut Na Ginorga Tu Rohangku ”   

Aut na ginorga tu rohangku, bohiM di na lao mate Ho/ Aut na huingot O Tuhanku, tongtong panghophopMi di  au/ Ai Ho do paluahon ahu, dosangku do pinorsanMi/ Didaoni Ho parsahitonku, martua au binahen nii.

Mauliate ma rohangku di Ho, O Jesus Tuhanki/Ho naeng tongtong hangoluanku, marningot denggan basaMi/Antong, sai tiop ma tanganku manogu au tu lambungMi/Di jalo Ho do tangiangku, sai pos do rohangki disi.

10. Epistel

*) U=Uluan;  H=Huria

U: Tabege ma Hata Ni Debata turpuk ni Minggu Parningotan Ari Hamamate Ni Tuhan Jesus sadari on, i ma Hata Ni Debata na tarsurat di Jesaya 53:1-9. “ Tung ise ma nuaeng porsea di jamitanami? Jala tangan ni Jahowa, tung ise ma naung tumandasa?

H: Ai simbur do Ibana tubu songon tumbur diadopan ni bohiNa, jala songon tunas sian tano na mahiang. Ndang adong hinauli ni rupana manang hamuliaonna; ia huida hami ibana, ndang adong rupana umbahen sihalomohononhon ibana.

U: Dileai jala dipasiding jolma do ibana, baoa na somal mangae pardangolan dohot sahit ibana, pola ditabunihon halak bohina maradophon ibana dibahen leana, jadi ndang pola hurajumi hami ibana.

H:  Tongon do angka sahitta diusung ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal ibana.

U:  Hape ala ni pangalaosionta ibana tartullang, binahaen ni hajahatonta ibana mabugang. Ampe tu ibana pinsang-pinsang parhitean ni hasonanganta, jala binahen ni bugangna malum itahilala.

H:  Luhut do hita lilu songon birubiru, ganup masitondong dalanna be, alai hajahaton ni hita sudena dihonahon Jahowa tu ibana.

U:  Dipasipal pe ibana, sai manaonnaon do anggo ibana, ndang manang manghuling pamanganna, songon birubiru do ibana na tinogu tu pamotongan, jala songon anak ni birubiru na hohom maradophon jolma sigustingi ibana, tung na so dibuha do pamanganna.

H: Dung malua ibana sian pardangolan dohot sian uhum, tung ise ma na tuk manjujur sundutna i? Ai sirang pe ibana sian tano ni halak na mangolu, binahen ni pangalaosion ni bangsongKu do mangonai pinsang-pinsang i tu  ibana.

H: Rap dohot halak parjahat hian tanomanna dilehon, hape rap dohot halak na mora ibana dung mate, ala na so adong na so uhum diula jala ndang adong sipaotooto dibagasan pamanganna.

U:  Songon i ma sahatna! Martua do halak na tumangihon hata ni Debata, jala  na umpeopsa.

U+H: Amen.

11.       Koor

12. Marende: BE No. 449: 1&3  “ Sai Solhot Tu SilangMi ”  

Sai solhot tu silangMi, Jesus ingananhu/Mual na mabaor disi ima inumonhu/

SilangMi Tuhanhi, ima pujionhu/Paima sogot sahat au,i endehononhu/

----- Jongjong-----

Domu ma tu silangMi, ima tioponhu/Asa unang lilu au, Ho ihuthononhu/

SilangMi Tuhanhi, ima pujionhu/Paima sogot sahat au,i endehononhu/

13.  Manghatindanghon Haporseaon

U: Rap dohot donganta sahaporseaon di sandok portibion, tahatindanghon ma haporseaonta i:

U+H: Ahu porsea di.......................................   Amen.            

------Hundul

14.       Koor

15.       Boa boa:

16.       Marende: BE No. 81: 1------     “ Jesus Mual Ni Ngolungku “ 

*) Pasahat pelean

Jesus mual ni ngolungku, sipangolu tondingki/ Ai dibunu Ho musungku, ima hamatean i/ Ho manaoni hamagoan, patupahon hangoluan/ Alani hupuji Ho tung marribu hali do.

Haleaon insahinsak, reherehe tijur pe/ Tali dohot pastappastap, tung ditaonhon Ho sude/ Paluahon au na pogos, sian tangan ni sibolis/ Alani hupuji Ho tung marribu hali do.

----- Musik -----

Bugang sada tanggurungmu, di na hona linsing i/ Hamamalum ni bugangku, na dirohangki do i/ Ho do gabe binuraan, au dapotan hangoluan/ Alani hupuji Ho tung marribu hali do.

Sungsang duri ditumpalhon, panginsahi i tu ho/ Jala tolong dilibashon, tu uluM pasiak Ho/ I ditaonhon Ho Tuhanku, alani hajungkatonku/ Alani hupuji Ho tung marribu hali do.

----- Musik -----

Tung tanganMu dohot patMu, ditorusi labang i/ Jadi tiris ma mudarMu, sian hau parsilang i/ I do mual paridian, di au jolma na hansitan/ Alani hupuji Ho tung marribu hali do.

Sai pinuji ma goarMu ala ni na bernit i/ Dohot ala ni mudarMu Jesus na nilehonMi/ Lao pasaehon dosanami, asa unang mago hami/ Ho hupuji alani salelenglelengna i.

17. Jamita: Markus 15:22-41

18. Marende: BE. 88:1-“ Di Surgo Do Alealenta ”  BL: 65

*) Pasahat pelean

Jesusku naung manobus ahu, sai naeng haholonganku Ho/ Tu dolok Golgata Ho laho, nionjar ni holongMu do/ Hupuji nasa asiMi, alai gumodang holongMi.

Tarsolsol bagi do rohangku, paidaida dangolMi/ Marningot sasude dosangku, ai i do na tinaonMi/ Hupuji nasa asiMi, alai gumodang holongMi

----- Musik -----

Jotjotna i husoadahon, Ho Sipangolu tondingkon/ Mabiar lao manghatindanghon, Ho na manghophop au tongon/ Hupuji nasa asiMi, alai gumodang holongMi

Bagas uhirhon tu rohangku, pangkophopMi humophop au/ Tusi ma togu pingkiranku, guru di Ho sambing ma au/ Hupuji nasa asiMi, alai gumodang holongMi

----- Musik -----

19. Ulaon Nabadia

·        Padirihon Parpadanan Na Badia

·        Mangan Parpadanan (huhut marende sian hal. 9 – 12)

·        Marende Pujipujian BE No. 9 : 1 “Hupuji Holong Ni”

Hupuji holong ni rohaMu 
O Tuhan Jesus Rajangki
Tu Ho hulehon ma tondingku 
Ai i do pinangidoMi
Huhalupahon ma diringku 
Mamingkir holong ni rohaMu

20. Tangiang Panutup.

·        Tangiang Pujipujian

·        Tangiang Pelean

·        Tangiang Ale Amanami

·        Pasupasu

·        Amen – Amen - Amen

------------------------ 000 -------------------------

Sunggul-sunggul: Taingot ma annon ro tu gareja on laho mandohoti Ulaon Na Hohom. Mulaanta ma ulaon i masuk pukul 14.00 Wib.

Lampiran 1 :               Angka Ende Marulaon na badia:

1.          BE. No. 153: 1-4 “O Jesus, naung sineat”         F = do

O Jesus naung sineat, di hau na pinarsilang.

RohaM tongtong daulat, nang uju Ho tarsilang.

Marutang hosa hami, ditaon Ho dosanami, Asi rohaM o Jesus.

Pelean na badia, na masuk tu Jahowa.

        Singkat ni manisia, na so daulat roha.

        Di taon Ho dosanami, so i lao mago hami, Asi rohaM o Jesus.

Pelean na badia, jinalo ni Debata

        Panaon ni manisia, na pasohothon bada

        Sai sesa dosanami, Ho hatigorannami, Asi rohaM o Jesus

Pelean na badia, dagingMu sipanganon

        Di angka na porsea, mudarMu siinumon

        Sai ro ma maringanan, marhite parpadanan. Di hami on, o Jesus.

2.          BE. No. 86 : 1 …      “ Silang Na Badia I”                     Bes = do

Silang na badia i Ho do lombulombungki

        Maralohon dosa i dohot pandelean i

        Di sude sitaonon i Ho ma lombulombungki

Nasa na huula i, ndang tau hasonanganki

        Nang ringkot pe rohangki, pola ro nang ilungki

        Holan asi ni rohaM, pangurupi o, Tuhan

Ro do au nuaeng tu ho, sai palambas ma rohaM.

        Nunga pola mate Ho, ala asi ni rohaM

        Jangkon au na dangol on, sai ulosi tondingkon.

Dosa patundukkon au, ho ma mangondihon au.

        Ramun situtu do au, mudarMi mamuri au,

        Na pogos, dangol au on, Ho ma artangki tongtong.

Silang na badia i Ho do lombulombungki

Molo puas hodokki di na suda bohalhi

        Di sude sitaonon i Ho ma lombulombungki.

3.          BE. No. 88 : 1…  “Di Surgo do alealenta”               Es = do

Jesusku naung manobus ahu, sai naeng haholonganku Ho

        Tu dolok Golgata Ho laho, nionjar ni holongMu do

        Hupuji nasa asiMi alai gumodang holongMi

Tarsolsolbagi do rohangku paidaida dangolMi

        Marningot sasude dosangku ai i do na tinaonMi

        Hupuji nasa asiMi alai gumodang holongMi

Jotjotna i husoadahon Ho, Sipangolu tondingkon

Mabiar lao mangkatindangkon Ho na mangkophop au tongon

        Hupuji nasa asiMi alai gumodang holongMi

Bagas uhirhon tu rohangku, pangkophopMi humophop au

        Tusi ma togu pingkiranku guru di Ho sambing ma ahu

        Hupuji nasa asiMi alai gumodang holongMi

4.          BE. No. 154: 1 …    “Sai palinggas ho”     Es = do

Sai palinggas ho tondingku, sai tadingkon ma arsakmu.

Ro ma ho tu hatorangan, asa dapot hasonangan.

Ai tarontang ho saonari, tu haroan na badia,

Na manggomgom parluhutan, naeng tu ho do maringanan.

Sai ringkoti ma manomu, na pangolu Ho tondingku

Na manuktuk do Ibana, di roham dibaen hataNa.

Ungkap pintu ni rohamu, asa bongot ma Rajamu,

Dok: Ingani ma rohangku, unang be tadingkononMu.

Sai malungun do rohangku, ale Jesus di basaMu.

Tung na tangis do rohangku, na malungun di mannaMu.

Na mauas do tondingku, ale Jesus di mudarMu.

Pinangido ni rohangku, hasasaor tu Debatangku.

Las huhut do angka hitir, rohangkon di na hupingkir.

Simosimo ni panganon, di bagasan parpadanan.

Ai na so tardodo roha, pinatupa ni Jahowa.

Ingkon Tondi Parbadia, pabotohon i tu iba.

Jesus holong ni rohangku, dipadoras Ho langkaMu

Manadinghon hasangapon, mandapothon hajolmaon.

Ai dilehon Ho dagingMu Hangoluan ni tondingku.

Diusehon Ho mudarMu, baen hasaean ni dosangku.

Jesus, Ho hangoluanku, unang so adong labangku.

Lao manganhon parpadanan, unang tung au hajeaan

Unang so lam huantusi, godang ni pangkaholongi,

Ni rohaM di huriaMu, Na tinobus ni mudarMu

5.          BE. No. 155: 1 -  “Naung moru do muse sataon”                      F = do

Tu son ma ho ale tondingku, di na mauas male ho

Manjalo basa ni Tuhanmu pinaradeNa i di ho.

Dilehon Jesus do dagingNa, marhitehite roti on,

Dilehon dohot do mudarNa, marhitehite anggur on.

Ai nang tongtong pe ganup ari, mudarNa mangurasi au.

Huhut Ibana so mansadi manogu tu lambungNa au.

Sai naeng au mangan parpadanan ni Jesus Kristus, Tuhanki.

Na padamehon parbadaan, na pasonangkon rohangki.

Asi rohaM di au o Jesus, tumpahi au sadari on.

Ai hataMi do hupatulus, manganhon parpadanan on.

Antong patiur ma rohangku, marningot denggan ni basaM.

I ma na tinaonMi dosangku, binaen ni holong ni rohaM.

Patogu haporseaonku, di hasasae ni dosangki.

Marsitiopan baen rohangku, di mudarMi na durus i.

Sai ro ma Ho ale Tuhanku, marhite parpadanan on.

JoroM ma baen nuaeng rohangku. Ho ma nampuna au tongtong.

6.          BE. No. 441: 1-   “Di au Tuhan Jesus”              G = Do

Di au Tuhan Jesus, na salpu do sudena,

Na dokdok, nang dosa, nang uhum tu au.

Ringkot do rohangku marhatopothon, Jesus ku, Tuhanku, Ditobus Ho au,

        Ref.   Disesa Tuhanku do angka dosangku.

Nang ho, ale dongan, di tobus nang ho.

Di au do dameNa, na sonang do rohangku.

Mangolu, nang mate, di Jesus au on.

Di ribur ni tano, nang las ni roha,

Ndang dapot dameNa, rumur rohangku.

Di au dohot surgo, sude hasonangan

Hinorhon ni Jesus, ale donganki.

Sai golom mudarNa, naeng ho partohap

Di sonang ni roha na sumurung i.

7.          BE. No. 213: 1…     “Dung sonang rohangku”  D = do

Dung sonang rohangku, dibaen Jesus I Porsuk pe hutaon dison

Na pos do rohangku di Tuhanta I Dipasonang tongtong rohangkon

Sonang do, sonang do, dipasonang tongtong rohangkon

Nang dihaliangi sibolis pe au, Naeng agohononNa muse

Naung mate Tuhanku, mangolu ma au, Utangki nunga sae sasude

Sonang do, sonang do, dipasonang tongtong rohangkon

Diporsan Tuhanku sandok dosangki, Bolong tu na dao do dibaen

Nang sada na so jujuronna be I, Na martua tondingku nuaeng

Sonang do, sonang do, dipasonang tongtong rohangkon

Mangolu nang mate di Jesus do au, Ibana haporusanki

HataNa sambing do partogi di au, Ai na tau haposanku do i

        Sonang do, sonang do, dipasonang tongtong rohangkon