ACARA MALAM PASSION III

TERTIB ACARA IBADAH PASSION

III

G O L G A T A

HKBP SE-RESSORT KEBAYORAN

JAKARTA SELATAN

ATURAN NI PARPUNGUAN DI TINGKI PARNINGOTAN

DI PANAONON NI TUHANTA JESUS

HKBP SE-RESSORT KEBAYORAN 

PASSION III

1.         Marende BE No. 84: 1 + 3    “ Aut na ginorga tu rohangku”                BL.195     

Aut na ginorga tu rohangku bohiM di na lao mate Ho!
Aut na huingot, o Tuhanku, tongtong panghophopMi di au!
Ai Ho do paluahon ahu, dosangku do pinorsanMi;
Didaoni Ho parsahitonku; Martua au binahen nii!   

Mauliate ma rohangku di Ho, O Jesus Tuhanki!
Ho naeng tongtong haholonganku marningot denggan basaMi.
Antong, sai tiop ma tanganku manogu au tu lambungMi;
Dijalo Ho do tangiangku; Sai pos do rohangki disi      

                                                                                              

 2.    Votum – Introitus - Doa

Marhitehite goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, Amen.

On do dipatupa Debata : Humophop hita gabe dosa do Ibana, na so tumanda dosa, asa gabe hatigoran ni Debata hita dibagasan Ibana.

Martangiang ma hita :

Ale Amanami na di Banuaginjang. Parasiroha na sumurung di sude jolma! Ndang diolani Ho AnakMu na sasada i, dilehon Ho do Ibana humophop hami, mamorsan dosanami sahat tu hau pinorsilang i. Sai patogu ma rohanami asa unang ganggu rohanami manghaporseai hasesaan ni dosanami, asa unang mandele hami ala ni dosanami, alai asa pos situtu rohanami diasi ni rohaM na godang i, marhitehite Tuhan Jesus Kristus Tuhannami, Anak haholongan ni rohaMi . Amen.

3.   Marende BE No. 81: 1     “Jesus Mual ni ngolungku”                      BL.185

Jesus mual ni ngolungku, sipangolu tondingki
Ai dibunu Ho musungku, ima hamatean i.
Ho manaoni hamagoan, patupahon hangoluan
Alani hupuji Ho, tung marribu hali do.

Asa ditogihon nasida ma Jesus sian jolo ni si Kayapas tu kantor. Alai sogot ma manogot i. Ndang na bongot anggo nasida tu kantor asa unang tarsubang nasida laho manganhon Paska i. Gabe ruar ma si Latus mandapothon nasida, didok ma : Pangaluan dia do diboan hamu dompak Halak on? Dung i, ninna nasida ma mangalusi : Aut unang sibahen na jahat Halak on , ndang tagamon pasahatonnami Ibana tu ho. Gabe ninna si Latus ma mandok nasida : Boan hamu ma Ibana, uhum hamu ma Ibana marguru tu adatmuna. Alai ninna angka Jahudi ma mandok Ibana : Ndang jadi pusaonnami manang ise.  Jadi dialuhon nasida ma Ibana , ninna: Na dapot hami do On pabalikbalikhon bangsonami jala mangorai mangalehon  guguan tu kesar i, dipandok : Raja, Kristus do Ibana. Jadi dibongoti si Latus ma muse kantorna, dijou ma Jesus, didok ma tu Ibana : Atehe, Ho do Raja ni Jahudi? Ro ma alus ni Jesus: Na sian roham do na nidokmi, manang na nidok ni halak do i tu ho taringot tu Ahu? Gabe dialusi si Latus ma : Ai halak Jahudi do Ahu. BangsoMi dohot angka sintua ni malim i do pasahathon Ho tu ahu, aha do na binahenMu? Jadi dialusi Jesus ma : Ndang sian portibi on harajaonKu, ndang tarbahen so mangalo angka naposongKu asa unang sahat Ahu tu tangan ni angka Jahudi. Alai ndang songon i harajaonKi. Dung i ninna si Latus ma mandok Ibana : Asa Raja do Ho? Jadi ninna Jesus ma mangalusi : Songon na nidokmi ma tutu, Raja do Ahu: Umbahen na tubu Ahu jala umbahen na ro Ahu tu portibi on, asa huhatindanghon  hasintongan i. Ganup na sian hasintongan i, tangihonon ni i do soarangKu. Jadi ninna si Latus ma mandok Ibana : Aha ma i hasintongan i? Jadi dung didok songon i, ruar ma ibana muse manopot angka Jahudi mandok tu nasida : Ndang jumpang ahu manang dia salana.

4.         Koor        :  Serafim

5.         Marende BE No. 88 :  2    “Jesusku naung manobus ahu”           BL.106

Tarsolsol bagi do rohangku paidaida dangolMi,
Marningot sasude dosangku, ai i do na tinaonMi.
Hupuji nasa asiMi, alai gumodang holongMi.

Alai lam digogohon nasida mandok : Digunturi Ibana do bangso i, ai mangajari do Ibana di sandok tano Judea mamungka sian Galilea sahat ro tuson. Alai umbege i si Latus, manungkun ma ibana, manang na halak Galilea Jesus. Jala dung diboto na sian gomgoman ni si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem uju i.

Marnida Jesus i si Herodes, las situtu ma rohana; ai nunga nania lelengna, sai naeng idaonna tanda sian Ibana sipatupaonNa. Jadi godanggodang ma disungkunhon tu Ibana; alai ndang dialusi Jesus ibana. Disi do angka sintua ni malim ro di sibotosurat, jala gogogogo do Ibana dialuhon. Ia si Herodes rap dohot donganna, direherehei jala dilealeai do Ibana, disolukhon ma pahean na arga tu Ibana, laos songon i ma disuru Ibana mulak tu si Latus. Jadi di na sadari ma maraleale si Herodes dohot si Latus, ai na masihosoman do nasida anggo na sailaon.

6.      Marende BE No. 77: 3     “Hamu saluhut halak”                           BL.65      

Aha do manginona tu ho silehon tua di hajolmaon i?
 Sodung hea mardosa Ho doshon hami jolma
 Ndang dung hea dibaen Ho dosa i.    

                                                                              

Alai peam do dipalua panguhum i di Pesta i sada halak na tarhurung, marguru tu na tinodo ni natorop. Alai adong ma tarhurung uju i sada parjahat na sumalin na margoar si Barabbas. Jadi di na pungu i nasida, didok si Latus ma tu nasida : Ise do dipangido hamu paluaonku, si Barabbas manang Jesus na targoar Kristus do? Ai diboto do, late ni rohanasida do umbahen na dipasahat nasida Ibana. Alai sai disosoi angka sintua ni malim rap dohot sintua ni bangso i do natorop i, asa dipangido nasida, malua si Barabbas, alai pusaon do anggo Jesus . Dung i ninna panguhum i ma mandok nasida : Ise sian na dua i dipangido hamu paluaonku? Jadi didok nasida ma : Si Barabbas ! Dung i  didok si Latus ma tu nasida : antong aha ma bahenonku tu Jesus, na targoar Kristus? Gabe saluhut nasida mandok : Parsilanghon ma! Alai ninna panguhum i ma : Ai aha ma na jahat dibahen? Jadi lam gogo ma dipanjouhon :  Parsilanghon Ma! 

7.         Koor : -   PS. Gabungan

-                   PS. Maranatha

8.         Marende BE No. 717 : 1, 3       “Di Na Hutatap Silang i”                              

Di na hutatap silang i, hamatean ni Rajangki,

Bolong na huasahon i, tudos tu orbuk na ma i.

Mabaor sian bugangNa i holongNa nang hansitNa i,

Si sungsang duri na posi, na gabe tumpal na uli. 

Dung i ditogu si Latus ma Jesus, didokhon ma linsingan. Jadi didandani soldadu ma sunsang duri bahen tumpal, diampehon ma i tu uluNa; baju dapdap ma dialithon tu dagingNa. Dung i ro ma nasida tu joloNa mandok : Tabi di Ho, ale Raja Jahudi! Laos dipastapi ma ibana. Dung i ruar ma muse si Latus, didok ma tu angka Jahudi : ida hamu ma, hutogihon do Ibana tu jolomuna asa diboto hamu na so adong jumpang ahu salana. Laos ruar ma Jesus manjujung sungsang duri jala marbaju dapdap. Jadi didok siLatus ma tu nasida : Ida hamu ma jolma i! asa dung diida sintua ni malim dohot angka naposo Ibana, dijouhon nasida ma: Parsilanghon, parsilanghon ma Ibana! Dung i didok si Latus ma tu nasida : Boan hamu ma Ibana, parsilanghon hamu ma: ai ndang jumpang ahu salana. Gabe dialusi angka Jahudi ma ibana, ninna ma : Marguru tu patiknami, ingkon marutang hosa Ibana, ai dibahen do diriNa Anak ni Debata. Umbege i si Latus . lam ganda ma biarna. Dung i di ulahi muse ma tu Kantorna, didok ma tu Jesus : Sian dia do Ho? Alai ndang dialusi Jesus ibana.

Dung i didok si Latus ma tu Ibana: Ndang angkupanMu ahu manghatai? Ndang diboto Ho, marhuaso ahu paluahon Ho jala marhuaso pasilangkon Ho? Jadi dialusi Jesus ma : Ndang adong huasom mangago Ahu, aut unang dilehon i tu ho sian ginjang. Dibahen i gumodang do dosa ni na pasahathon Ahu tu ho. Jadi olat ni i ma dilului si Latus dalan paluahon Ibana. Alai manjujui ma angka Jahudi, ninna do: Molo dipalua ho On, ndang aleale ni Kesar ho! Ai  na mangalo Kesar i do ganup na mambahen dirina gabe raja. Asa dung dibege si Latus hata i, ditogihon ma Jesus haruar, laos hundul Ibana dihabangsa paruhuman i , na di inganan na margoar : Pantar Batu, Gabbata  didok anggo di hata Heber . I ma na masa diari parhobasan ni Paska i, mareak hos ni ari. Dung i didok ma tu angka Jahudi : Ida hamu ma rajamuna! Alai digogo nasida ma manjaohon: Padao, padao, ma i, parsilanghon ma Ibana! Dung i didok si Latus ma tu nasida : Parsilanghononku ma rajamuna? Jadi dialusi angka sintua ni malim i ma : Ndang adong rajanami dungkon ni Kesar i! Asa dung diida si Latus, na so marguna hatana, lam ganda tahe gaorna, dibuat ma aek mamuri tanganna dijolo ni natorop i, huhut mandok : Lias do ahu sian mudar ni On! Hamu do na sari disi dung i ninna sude natorop i ma : Marsapata tu hami dohot tu ianakhonnami ma mudarNa i. Dung i saut ma dipalua si Barabbas. Alai anggo Jesus dilinsingi, dung i dipasahat ma, asa diparsilanghon.

9.         Koor : Sektor Sauduran

10.     Fragmen : “Pengadilan, Petrus menyangkal Yesus sampai dengan Yesus

dibawa untuk disalibkan”.

11.     Marende BE No. 88 : 2+4     “Jesusku naung manobus ahu”    BL.106

Tarsolsol bagi do rohangku paidaida dangolMi,
Marningot sasude dosangku, ai i do na tinaonMi.
Hupuji nasa asiMi, alai gumodang holongMi.

Bagas uhirhon tu rohangku, pangkophopMi humophop au;
Tusi ma togu pingkiranku, guru di Ho sambing ma au.
Hupuji ... du.

12.     Marjamita :

13.     Marende No. 695 : 1+2              “Jesus Tuhanku di Ho ma au on”           

   (Pelean)

 Jesus Tuhanku di Ho ma au on
Asa mangihut tu Ho au tongtong
Gohi rohangku ingani au on
Sonang di Ho tongtong
O Tuhan togu ma au
O Tuhan togu togu ma au
Gohi rohangku ingani au on
Sonang di Ho tongtong

Mansai godang do pardangolanki
Tagan so Jesus dope tohaphi
Disesa Jesus sude dosangki
Gok dame rohangki
Asi rohaNa di au
Tongtong asi rohaNa di au
Disesa Jesus sude dosangki
Gok dame rohangki

                                                                                                                                                            

14.     Tangiang Panutup