ACARA MALAM PASSION I

PARTURE NI ACARA IBADAH PASSION

I

G O L G A T A

HKBP SE- RESSORT KEBAYORAN

JAKARTA SELATAN

PARTURE  NI PARPUNGUAN DI PARNINGOTAN

PANAONON NI TUHANTA JESUS  

                                          PASSION I

HKBP SE-RESSORT KEBAYORAN 

                                   

1.         Marende BE No. 76, 1 – 2   “Sada nama sangkap ni rohangku”          BL. 199   

Sada nama sangkap ni rohangku di sandok portibi on
Ndang tagamon na so las rohangku, molo jumpang au inon
Naeng ma sai ingoton ni rohangku na binaen ni Jesus tu tondingku
Uju pinorsanNa i, saluhutna dosangki

Ingkon sai Ibana ingotonku, uju na tarpajal i
Tu hau pinarsilang ginantungkon, sai mabaor mudarNa i
Ai humophop au ditaon uasNa asa dohot au muse upaNa
Ai ditatap do au on di pandokNa: "Nunga sun!"

                       

2.            Votum – Introitus - Tangiang

Marhitehite Goar ni Debata Ama dohot ni AnakNa Tuhan Jesus Kristus dohot Goar ni Tondi Parbadia. Amen.

        Tabereng ma induk ni haporseaon i jala na paujunghonsa, i ma Jesus na manaonhon parsilangon i, singkat ni las ni roha tohapNa i hian, so dietong i hailaon, gabe hundul di siamun ni habangsa ni Debata : Paingotingot hamu ma Ibana, na pataontaon paraloan sisongon i dompak Ibana sian angka pardosa, asa unang marnaloja hamu, unang mandate tondimuna!

        Martangiang ma hita :

            Ale Tuhan Debata, Amanami na di Banuaginjang! Asi ma rohaM di hami halak na gale on. Diida Ho, na gogo do musunami, sai talu do hami dibahen ala ni hagaleonnami. Dibahen i hupangido hami tu Ho: sai pargogoi jala pamonang ma hami maralohon  musu i marhitehite panaonon ni Anak haholongan ni rohaM, Tuhan Jesus Kristus. Amen. 

3.         Marende BE No. 83: 1  “Na Lao Do Biru biru”                  BL.214

Na lao do Birubiru i mamorsan angka dosa

Ni nasa hajolmaon i dibenget ni rohana

Diporsan do sahitta i dilehon do DiriNa i

Tu tangan ni pamunu ditaoni do na bernit i

Ro di na tos hosaNa i, didok : “Naeng porsanonku”.

Jadi diarahon Jesus ma na sampuludua i, jala didok ma tu nasida: Na nangkok ma hita tu Jerusalem, jala tulus ma tu Anak ni Jolma i sasudena, na tarsurat di angka panurirang.

Ai pasahaton ma Ibana tu angka parbegu, gabe insahanna, leaanna jala tijuranna ma Ibana; dung i mulak mangolu ma Ibana di ari patoluhon. Alai ndang diantusi nasida agia otik sian i; na buni do Hata i sian rohanasida, ndang diboto nasida na hinatahonNa i. Dung i dipansang angka Sintua ni malim i dohot angka Parise ma rapot godang, didok nasida: “Aha ma bahenonta? Ai lan do tanda dibahen Halak i! Molo itapasombu Ibana, porsea ma halak saluhutna tu Ibana, gabe ro ma halak Rom mangarampas tanonta dohot bangsonta”. Alai hehe ma sada sian nasida, i ma si Kayapas, sintua ni malim di na sataon i, didok ma tu nasida : “Na hurang roha do hamu! Ndang dipingkiri rohamuna, denggan do mate sahalak humophop natorop i, unang laho mago sandok bangso i”.

Alai ndang sian rohana sandiri dihatahon i; ala sintua ni malim ibana di na sataon i umbahen na disuriranghon, na naeng mate ma Jesus humophop bangso i. Alai tahe, ndada holan laho manghophop bangso i, alai naeng papunguonNa angka anak ni Debata, angka na marserak dope, laho pasadahon. Asa olat ni sadari i martuptup ma nasida laho mamusa Ibana. Alai didok nasida ma : “Unang ma di pesta i, sotung guntur natorop i!”

4.         Koor        : Ina Hanna

5.         Marende BE No. 413: 1               “Hutanda Haporusanki”BL. 275 

Hutanda haporusanki, na sonang, i ma silang i

Marendeende au disi, ai au na niasian i

ParsilangMi, o Tuhanki, do haporusan ki

ParsilangMi, o Tuhanki, tung sonang au disi

                                                                                             

Dung i onom ari nari asa dapot Pesta Paska i, sahat ma Jesus tu huta Bethania, na niinganan ni si Lazarus, na sinunggul ni Jesus sian na mate. Jadi dipaulinasida ma disi panganon ujuan di Ibana; si Marta do manghobasi, si Lazarus ma sada donganNa mangan disi. Gabe dibuat si Maria ma sahati miak Nardus na arga na so marsaor, dimiahi ma pat ni Jesus, obukna ma dibahen mangalapu. Jadi digohi uap ni miak i ma bagas i. Jadi sada sian angka siseanNa, si Judas Iskariot na naeng manjejehon Ibana, mandok: “Boasa so ginadis miak i arga tolu ratus hupang, bahen silehonlehon nian di angka na pogos?” Alai ndada na pogos sinarihonna, umbahen na didok ibana songon i; panangko do ibana tahe, diusung do asiasi ni halak, ai tu ibana dipasahat puro i. Dungi i ninna Jesus ma: “Pasombu ma ibana, ai diparade do i hira tu ari hatatanomHi. Ai tongtong do adong na pogos di tongatongamuna, jala asal ma olo hamu, tarpatongon hamu do na denggan tu nasida; alai anggo Ahu ndang manontong di hamuna. Intap na tarbahensa do na niulana i; na manjoloani do ibana mamiahi pamatangHu songon di na mananom. Situtu do hatangkon tu hamu: Manang didia di liat portibi on dijamitahon muse barita nauli on, hatahononna do nang na binahenna i gabe baritana”.

6.         Marende BE No. 79: 7   “Di Na Ponjot Rohangku”                             BL.124

Sai naeng ma tiruonku pambaenanMi di au
Tu sasude donganku; Jesus urupi au
Manghaholongi donganki, unang tung marpambuat nang marpangansi pe

Dung i torang ni arina i, dibege halak na torop na ro tu pesta i, na naeng ro ma Jesus tu Jerusalem, jadi dibuat nasida ma angka maremare laho manomunomu Ibana huhut manjoujouhon: “Hosianna! Pinasupasu ma na ro marhite Goar ni Tuhan i, Raja ni Israel”. Dung i dapot Jesus ma halode sada, i ma dihunduli hombar  tu na tarsurat: “Unang ho mabiar ale boru Sion, ida ma: Rajam do na ro, marsihundul di anak ni halode”. Jala halak Parise, dohot deba na sian natorop i, mandok tu Ibana: “Orai antong angka siseanMi, Guru!” Alai ninna ma mangalusi: “Hudok ma di hamu, aut mauhom nasida, joujou ma angka batu!”

7.         Koor : Sektor Godung 

8.   Marende BE No. 82 :1    “O Jesusku, Tu bugangMu”                 BL.21

O Jesusku, tu bugangMu, ro marsomba rohangkon

Sai tarpuji, sai tarpuji, na pamalum tondingkon!

Alai dibongoti sibolis i do si Judas na margoar Iskariot, sahalak sian na sampuludua i. Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida. Jadi sian las ni rohanasida marpadan ma nasida mangalehon hepeng tu ibana. Dioloi si Judas ma i, jadi dilului ma tingki na une pasahathon Ibana so sian pamotoan ni natorop i. 

Alai di ari parhobasan parjolo ni Pesta Paska i, didapothon siseanNa ma Jesus, angka ninna ma: “Tudia ma patureonnami di Ho, panganon Paska i, dipangido rohaM?” Gabe didok ma : “Laho ma hamu tu huta i manopot si Anu, dok hamu ma tu ibana: Tona ni Guru i ; na dapot ne ma tingkingku, di ho ma ahu sorang, laho mangan Paska i rap dohot siseanku”. Jadi saut ma disuru Ibana siseanNa dua halak jala didok ma tu nasida: “Molo laho hamu tu huta, pajumpang ma hamu disi dohot sada halak na mangusung aek sahudon, ibana ma ihuthon hamu! Tu ibana ma dok hamu : Di dia do bilut inganan, asa disi hupangan hami paska i? Jadi patuduhonna ma  tu hamu bilut parginjang sada, na lambas, na tipak hinembangan, disi ma pature hamu di hita!” Jadi borhat ma siseanNa, dibongoti ma huta i, jadi jumpang nasida ma tutu songon na nidokNa i, gabe dipature ma Paska i. Asa dung bot ari, ro ma Jesus dohot  na sampulu dua i”. Jadi di na mangan nasida, hehe ma Jesus sian na mangan i, ditanggal ma ulosNa, dibuat ma basahan ditapolhon tu Ibana. Diusehon ma aek tu sambong, dung i diburi ma pat ni angka siseanNa, diapusi ma dohot basahanNa na tinapolhonNa i.

Dungi i sahat ma Ibana tu si Simon Petrus, jadi didok ma mandok Ibana : “Tung Ho ma ale Tuhan, mamuri pathu?” Dung i ninna Jesus ma mangalusi ibana: “Ndang diantusi ho pambahenanKu na tuho anggo nuaeng, muse pe botoonmu i”. Dung i didok si Petrus ma tu Ibana : “Matua tano on, ndang burionMu pathu”.  Dungi ninna Jesus ma mangalusi ibana : “Molo so burionKu ho, ndang partohap ho di Ahu”. Dungi ninna si Simon Petrus ma : “Ale Tuhan, unang ma holan pathu, dohot ma tangan dohot ulungku”. Gabe didok Jesus ma tu ibana: “Halak naung maridi i, ndang ingkon  be burion; ai nunga sude ibana ias. Naung ias do anggo hamu, alai ndang luhut hamu. Ai ditanda do sipasahat Ibana, umbahen na didok : Ndang saluhut hamu ias.  Asa dung diburi Jesus patnasida, dipangke ma muse ulosNa, hundul ma Ibana, didok ma tu nasida : “Ai diantusi hamu do pambahenanKi tu hamu? Digoar hamu do ahu Guru dohot Tuhan, jadi ture do pandokmi disi, ai i do Ahu tutu. Asa molo ahu Tuhan jala Gurumuna mamuri patmuna, tama ma nang hamu masiburian pat! Ai sitiruon do Hulehon tu hamu, asa dibahen hamu songon naung Hubahen i tu hamu! Na tutu situtu do na Hudok on tu hamu: Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa.

9.         Koor : Sektor Saroha

10.     Marende BE No. 83 : 4        “Na Lao Do Birubiru I”                            BL. 214        

Saleleng na mangolu au naeng ingotonku Jesus
Sude na binaenMi di au hataM naeng hupatulus
Ho naeng haholonganku do huhut ihuthononku Ho
Di dalan hangoluan tung ingkon Ho nampuna au
Mangolu manang mate au sai Ho do tioponku. 

[

Jadi di na mangan i nasida, ninna Jesus ma: “Situtu do na hudok on tu hamu: Sada sian hamu naeng pasahathon Ahu!” Dung i marsak situtu ma nasida, gabe dipandok be ma tu Ibana : “Nda tung ahu i Tuhan?” Alai ninna ma mangalusi: “Ia i na rap dohot Ahu manurdukhon tanganna tu paringkauan, i do na pasahathon Ahu! Tong do nian ujung ni Anak ni Jolma i songon na tarsurat hian; alai marjea do halak na pasahathon Anak ni Jolma i. Tagonan unang ma sanga tubu ibana tu hasiangan on”. Alai adong ma sada sian angka siseanNa i, na hundul jumonok tu Ibana, haholongan ni Jesus i. I ma dihilap si Petrus, jadi ninna ma mandok ibana : “Sungkun ma, ise na nidokNa i”. Jadi dipajonok ma tu lambung ni Jesus mandok tu Ibana : “Tuhan, ise i?” Gabe dialusi Jesus ma : “Ia tusi hulehon na santopik na husornophon on, i ma ibana”. Jadi disornophon ma santopik, dilehon ma tu si Judas Iskariot, anak ni si Simon.

Jadi dung dibondut i, dibongoti sibolis i ma ibana. Dung i didok Jesus ma tu ibana: “Humatop ma  ula siulaonmu”. Asa dung dijalo si Judas na santopik, dilehon ma tu si Judas Iskariot, pintor laho do ibana tu balian, alai borngin ma uju i.

     

11.     Koor : Sektor Satahi

12.     Marende  BE No. 173: 4     “Sai mulak sai mulak”            BL. 63   

Sai mulak, sai mulak, ai na sonang ma ho!
Molo sesa dosam jala sabam roham. O, Parjalang ho!
Mulak, mulak ma ho, mulak, mulak ma ho.   

                                                                                        

Jadi di na mangan i nasida, dihindat Jesus ma roti, dipasupasu ma, diponggoli ma jala diparlehon ma tu angka siseanNa, huhut ma didok: “Jalo hamu, pangan hamu, dagingKu do on”.

Dung i dihindat ma panginuman i, didok ma mauliate, dilehon ma tu nasida, huhut ma didok : “Sude hamu manginum sian i. Ai mudarHu do on, mudar parpadanan i, na niusehon humophop torop bahen hasesaan ni dosa. Alai hudok ma tu hamu : Na so tupa be inumonKu olat ni on sian parbue ni hau anggur i sahat ro di ari sogot; disi ma inumonKu na imbaru rap dohot hamu di Harajaon ni Damang”.

13.     Fragmen  : “ Yesus Membasuh Kaki Murid-MuridNya Dengan Perjamuan”

14.     Marende  BE No. 153 : 4     “O Jesus Naung Sineat”                    BL. 126  

Pelean na badia, dagingMu sipanganon
Di angka na porsea, mudarNa siinumon
Sai ro ma maringanan marhite parpadanan 

Di hami on, o Jesus !

Jadi dung diendehonnasida ende pujipujian i, ruar ma nasida tu Dolok Jetun. Disi ma didok Jesus tu nasida : “Saluhut do hamu naeng targasip mida Ahu di na saborngin on. Ai na tarsurat do : lombutanku ma parmahan i, gabe marserak ma birubiru na sapunguan i”. Alai ninna si Petrus ma mangalusi Ibana : “Agia sude targasip mida Ho, anggo ahu, na so tupa targasip”. Alai ninna Jesus ma mandok ibana : “O Simon, Simon nunga dipangido sibolis naeng segeonna hamu songon dahanon. Alai Ahu do manangianghon ho, unang mintop haporseaonmi. Jadi dung mulak sogot roham, pargogoi ma roha ni angka hahaanggim!” Alai ninna si Petrus ma mandok Ibana : “Tuhan, na hobas do ahu mandongani Ho tu hurungan, nang tu hamatean pe!” Alai ninna Jesus ma : “Hudok ma tu ho Petrus : Ndang martatahuak manuk saborngin on, so jolo tolu hali soadahonmu na so tinandam Ahu.”

15.     Marende BE No. 88 : 3-4      “Jesusku Naung Manobus Au”          BL. 106 

Jotjotna i husoadahon Ho, Sipangolu tondingkon

Mabiar lao mangkatindangkon Ho na manghophop au tongon

Hupuji nasa asiMi alai gumodang holongMi

Bagas uhirhon tu rohangku panghophopMi humophop au

Tusi ma togu pingkiranku guru di Ho sambing ma ahu

Hupuji nasa asiMi alai gumodang holongMi

16.     Marjamita :

17.     Marende  BE No. 412 :  1, 3       “Ndi di dolok adui”               BL. 387   

(Persembahan)

Ndi di dolok adui  Silang ni Tuhan i sap mudar, sap tijur do i

Jesus mate disi asa malum dibaen sude angka gondok roha i
Dibaen i, tung holong rohangki mida silang di Golgata i
Hupasolhot diringku tusi dompak Surgo pardalananki

Na mabaor sian i  mudar ni Tuhan i na tau paiashon au on

Tung na bernit ditaon Tuhan Jesus disi paluahon sude hita on

Dibaen i, tung holong rohangki mida silang di Golgata i

Hupasolhot diringku tusi dompak Surgo pardalananki

18.     Tangiang Panutup