ACARA MINGGU ADVENT - I DOHOT TAON BARU PARHURIAON

ACARA MINGGU ADVENT - I

DOHOT TAON BARU PARHURIAON

“MANAGAM HARORO NI SIPALUA”

(4 Musa 24:15-17)

HKBP RESSORT KEBAYORAN

Minggu, 02 Desember 2018

(ACARA BAHASA BATAK)

ACARA MINGGU ADVENT - I

DOHOT TAON BARU PARHURIAON

Minggu, 02 Desember 2018

Tema: “Managam haroro ni Sipalua” (4 Musa 24:15-17)

01.  JOUJOU TU PAMUJION :

       *) L: Liturgis ; H: Huria ; S: Sude

       L   :  Huria na hinaholongan ni Tuhanta Jesus Kristus, tama situtu do hita mandok mauliate tu Debata, di naung tolhas hita tu Minggu Advent na parjolo dohot tu taon baru parhuriaon sadari on. Minggu Advent, i ma partingkian di hita angka na porsea paradehon dirinta dohot rohantata mamestahon ari parningotan di hatutubu ni Tuhanta Jesus Kristus.

       H  : Mandok mauliate do hami di pardalanan ni ngolu naung hubolus hami. Huhaposi hami do holong ni rohaM na mangurupi hami.

       L   :  Nunga tabolus ariari ni ngolunta, pasingkat-pasorin ragam ni ngolu tadalani. Alai ala ni holong ni Debata, margogo dope hita sahat tu tingki on.

       H  : Mandok mauliate do hami tu adopanMu na badia i, holong ni rohaM do na hupangasahon hami di ngolunami.

       L   :  Mandok mauliate do hami disude pandonganioMu dohot holong ni rohaM. Mandok mauliate do hami di angka partingkian naung hubolus hami, jala di Minggu Advent on pargogoi ma hami manghangoluhon panomunomuon di asi dohot holong ni rohaM.

       S   : Marsangap ma Ho, ale Debata Ama, di bagasan Tuhan Jesus Kristus, manongtong ro di saleleng ni lelengna. Amen.

       L   :  Antong marende ma hita di bagasan las ni roha laho mamuji Tuhanta.

02.  Marende : BE. 39:1-3 “Beha ma panjalongku”

       Beha ma panjalongku, di Ho o Tuhanki ?;

         Beha ma panomungku, di Ho o Rajangki ?

         Sondangi ma rohangku, na holom na bodo,

         Ai naeng patupaonku, las ni rohaM di Ho.

              Pangisi ni SionMu, do mangolophon Ho;

              Lao songon i rohangku, lao mandapothon Ho,

              Na ringgas do rohangku, mamuji goarMi,

              Na daulat do sangkaphu, patulus rohaMi.

Jongjong

         Ai ndang adong na hurang, na pinatupaMon;

         Mambaen tu au sumuang, dame ni rohangkon,

         Ai di na marsak ahu, binaen ni dosa i,

         Ro Ho ale Pangolu, mandaoni sahithi.

03.  VOTUM-INTROITUS-TANGIANG :

       L   :  Marhitehite goar ni Debata Ama, dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on.

       S   : Amen.

       L   :  Didok Tuhanta Jesus : Ida ma, hatop do Ahu ro. Tiop ma na di ho nuaeng, asa unang adong na mambuat tumpalmi. Haleluya!

       H  : (Mangendehon) Haleluya..., haleluya...., haleluya...!

       L   :  Martangiang ma hita! Ale Tuhan Debata, Pargogo na so hatudosan, na tumompa langit dohot tano, hinorhon ni asi ni rohaM do umbahen sahat hami tu taon Huria na imbaru on. Lehon ma tu HuriaM TondiM na badia i dohot hamaloon sian Ho, asa lam rarat jala ganda harajaonMu di tongatonga ni hami on. Sai lehon ma hiras ni roha tu naposoM mangkatahon HataM, asa lam denggan HuriaM marhite sian i. Pargogoi ma hami mangoloi Ho di bagasan haporseaon na tongtong, asa manahan hami sahat ro di ujungna marhitehite AnakMu Jesus Kristus Tuhannami. Amen.

Hundul

04.  Marende : BE. 591:1+3 “Boru Sion“

       Boru Sion, las roham, las roham Jerusalem,

         Ai na ro do Rajami, padamehon ho tongtong,

         Boru sion, las roham, las roham Jerusalem.

                Hosianna, ro ma Ho! Masuk Ho tu rohangkon,

                Baen mardame tondingkon, lao manjangkon haroroM,

                Anak Daud ro ma Ho! Masuk Ho tu rohangkon.

05.  PATIK :

       L   :  Tangihon hamu ma patik ni Debata di Minggu Advent na parjolo di Minggu on, ima “Panindangion haporseaon (Konfesi) HKBP”, bindu 6, taringot tu Haroro ni Tuhan i. Tahaporseai jala tahatindanghon do : Na ro do Tuhan Jesus paduahalihon papatarhon Jerusalem na imbaru i, songon hapataran ni hasangapon dohot hamuliaon ni Debata. Disi ma marujung hasiangan on. Ndang adong na umboto sadihari ombas ni haroroNa i. Ala ni i ingkon hobas jala dungo do na porsea i di bagasan hasatiaon dohot panghirimon di haroroNa i, ai disi ma masa uhum dohot asi ni rohaNa. Marhite poda on, taharingkothon do mamangke tingki ni ngolunta on songon tingki parasian dalan manomunomu haroro ni Tuhan i. Tatulak do bangko na sai manguji mamilangi dohot manontuhon ari haroro ni Tuhan i paduahalihon. Songon i dohot pingkiran na mandok na so adong ujung ni hasiangan on. Antong, rap mangido gogo ma hita sian Tuhan Debata.

       S   :           Ale Tuhan Debata sai pargogoi ma hami mangulahon na hombar tu patikMi. Amen.

06.  Marende : BE. 44:3+5 “Hamuna na porseai sai tomu Tuhan Jesus i”

       Sigati rohamuna be, sai tanda dosamu sude, paringkot rohamuna,

         Manjangkon Sipalua i, na tuat sian surgo i, manggarar utangmuna,

         Tanda hata hangoluan na binoan ni Tuhanta, na pasae sude dosanta.

Jongjong

         O Debata, asi rohaM, tumatap hami huriaM, sai taiti rohanami,

         Tu Jesus Kristus, AnakMi naung ro tu hajolmaon i, baen hatuaonnami,

         Tomos, gomos baen ma hami mardalani tu na sonang, sahat tu banuaginjang.

07.  MANOPOTI & BAGABAGA HASESAAN NI DOSA :

       L   :  Huria na hinaholongan ni Tuhanta Jesus Kristus! Di bagasan unduk dohot serep ni roha, tatopoti ma dosanta jala tapangido ma hasesaan ni dosa sian adopan ni Debata, martangiang ma hita : Ale Tuhan Debata, Parasiroha jala na badia, Amanami di bagasan Jesus Kristus. Ro hami tu adopanMu na badia i, ala manghilala do hami di asi dohot holong ni rohaM.

       H  : Dibagasan unduk dohot serep ni roha, ro hami tu adopanMu manopoti nasa dosa pangalaosionnami. Tung jotjot do hami mardosa jala manimbil sian dalan hasintonganMi.

       L   :  Godang do hasusaan na uadopi hami, ala ni angka pangalaosionnami, tarlumobi ma na hurang mampu hami mangarajai angka pasupasuM marhite alam, tano, angka hau, aek, udara; saluhutna nunga lam sega alani hubahen hami jolma manisia.

       H  : Hasesega ni alam dohot lingkungan mambahen bangsonami mangadopi parsorion na pasingkat-pasorin marhitehite banjir, longsor, gempa bumi dohot angka na asing dope.

       L   :  Alai porsea do hami, ndang pasombuonMu hami di saluhut hahurangan dohot hadosaonnami i. Na manghirim do hami di pangurupionMu laho paimbaruhon roha dohot pingkirannami be. Alani, asi ma rohaM di hami. Sai unang paingotingot angka hadosaonnami na godang i, ala ni AnakMu, Tuhan Jesus Kristus, Sipalua hami.

--- (Tangiang na hohom, diiringi musik lembut : BE. 174:1) ---

       L   :  Bagabaga ni Debata, taringot tu hasesaan ni dosanta : Songon sintongna mangolu Ahu, ninna Tuhan Jahowa, tung na so lomo do rohangKu mida hamatean ni parjahat, na lomo do rohangKu mida hamumulak ni parjahat i, tumadingkon dalanna, asa mangolu ibana. Hasangapon ma di Debata na di ginjang!

       S   : Amen!

Hundul

08.  Marende : BE. 437:3 “Tung na muba rohangku”

       HaroroNa hutagam, ndang uhum tahe, dung Jesus maringan di au;

         Dohot au ma partohap di sangap muse, dung Jesus maringan di au,

         Dung Jesus maringan di au, dung Jesus marinagan di au,

         Tung na sonang do au, dung tu Jesus au lao, dung Jesus marinagan di au.

09.  EPISTEL :

       L   :  Tabege ma hata ni Debata turpuk epistel diMinggu Adven parjolo sadari on, ima Pangungkapon 22:16-20, tajaha ma marsorinsorin : Ahu, Jesus, marsuru surusuruanku, mangkatindangkon tu hamu angka on, mandapothon angka huria i. Ahu do urat dohot marga ni Daud, bintang sipaias na marsinondang i!

       J   : Jadi didok Tondi dohot oroan i: Ro ma Ho! Laos dohonon ni na umbegesa: Ro ma Ho! Sai ro ma na mauas; dijalo na giot roha i ma aek hangoluan i, dalan basabasa!

       L   :  Ahu mangkatindangkon di ganup, na umbege angka hata panurirangon ni surat on: Ia adong na manambai tusi, tambaan ni Debata ma tu ibana angka haporsuhon, na tarsurat di bagasan buku on.

       J   : Jadi molo adong na mamuati angka hata ni buku panurirangon on, buatan ni Debata ma tohapna na di hau hangoluan dohot di huta na badia i, angka na tarsurat di bagasan buku on.

       L   :  Didok Ibana na mangkatindangkon on; Olo, na ro ma Ahu tibu! Amen; ro ma Ho, ale Tuhan Jesus! I ma sahatna, Martua do angka na tumangihon Hata ni Debata jala naumpeopsa.

       S   : Amen.

10.  Koor :

11.  Marende : BE. 341:1+7 “Tibu ma jumpang”

       Tibu ma jumpang tingki ni, panopot ni Tuhanta;

         Di hita manisia i, mandabu paruhumNa,

         Tu nasa na mangolu i, nang tu sude naung mate pe, I ma didok hataNa.

Jongjong

                O Jesus leleng do hape, AriM paimaonnami;

                Mabiar hami sasude, dibaen sitaononnami,

                Sai ro ma Ho, ro ma tibu, palua hami situtu, Sian sude pangago.

12.  MANGHATINDANGHON HAPORSEAON :

       L   :  Di bagasan sada panindangion dohot donganta sahaporseaon di sandok portibion tahatindanghon ma haporseaonta i, rap ma hita mandok :

       S   :  Ahu  porsea di Debata Jahowa………

 Hundul

13.  Koor :

14.  TINGTING :

15.  Marende : BE. 41:1... “Parripe ni Tuhanta”

Pelean Ia + Ib

       Parripe ni Tuhanta, sai hehe ma hamu;

         Sai jangkon ma Rajanta, arroha na burju,

         Girgir ma hita be, marende di Ibana,

         Manjouhon Hosianna, burju ma sasude.

                Hamu na marsak roha, jonok do Raja i;

                Na ro mangapul roha, ni nasa na tungki,

                Torop nuaeng tahe, inganan hasonangan,

                I ma partangiangan, ni na porsea i.

--- Musik---

         Hamu na so mararta, di hasiangan on;

         Na mora do Rajanta, na ro tu hita on,

         SarihononNa do, saluhut na hasea,

         Alai saluhut jea, pabalionNa do.

        

                Antong girgir ma hita, manomu raja i;

                Mangungkap di Ibana, sandok rohanta i,

                Denggan tabaen nuaeng, dalanna tu rohanta,

                Na naeng pasonangonNa, tiur ma i tabaen.

16.  JAMITA : 4 Musa 24:15-17

17.  Marende BE. BE. 539:1--- “Sai hutagam do Tuhanku”

       Pelean II

       Sai hutagam do Tuhanku, sai masihol rohangki,

         Diharoro ni Tuhangku songon na nidokNa i,

         Sai mardongan olopolop huriaM managam Ho,

         Maranata ro, o Tuhan, amen, sai tibu ma ro!

         Las ni roha ndang hapalang do manggohi rohangki,

         Dung binege soaraNa di na ro Tuhanta i,

         Sai mardongan olopolop huriaM managam Ho,

         Maranata, ro, o Tuhan, Amen, sai tibu ma ro!

--- Musik ---

                Sai rade, ale tondingku, tagam panjouonNa i,

                Sai tu langit an manomu ho di Jesus Tuhanmi,

                Sai mardongan olopolop huriaM managam Ho,

                Maranata, ro, o Tuhan, Amen, sai tibu ma ro!

         Ai tagamon nunga borhat, Ho, Tuhanku, sian i?

         So tung unang au tarlalap, tading di na rodop i,

         Sai mardongan olopolop huriaM managam Ho,

         Maranata, ro, o Tuhan, Amen, sai tibu ma ro!

20.  Tangiang Panutup

Selamat Advent

Tuhanta ma mamasumasu hita!